آمال و امنيات

هلا وسهلا

ليش ديرتنا مافيها مترو انفاق او شبكة قطارات محليه داخل المدينه؟؟
دايما مايضايقني مشوار الكليه في الصباح الباكر... لما اطلع من البيت اكون منشرح الصدر مرتاح لكن مايمديني اطلع على الشارع العام الاوتبدا رحله المتاعب اليوميه من زحمه واشاره خربانه تفتح خمس ثواني وتسكر وسوء القياده والسرعه وغيرها وغيرها من معوقات وصولك لعملك او مقر دراستك وهذا الشيء احس انه يسبب لي نرفزه فظيعه ويعكر صفاوة ذهني......وكله بسبب الزحمه .
كل يوم اتخيل لو كان عندنا قطارات او محطات باصات نستقلها من نقطه معينه واقرأ جريدتي او مجلتي واشرب القهوه وانا مرتاح البال وليس هناك مايدعوني للتضايق من اي شيء واحس ايضا انه راح يؤثر على مردودي الدراسي وحرصي على المواظبه الدائمه... فنحن بازدياد وسنه بعد سنه راح يزيد الاختناق المروري ..........فأتمنى من كل قلبي انشاء شبكه تخدم ولو بنسبه خمسة عشر بالميه لخفض الازدحامات المروريه.
======================
هجرة العقول البشريه!!
من العقبات التي تواجهها بلادنا في التنميه وخططها الا وهي هجرة العقول البشريه التي تمثل المتخصصين في المجالات الالكترونيه والفنيين وذوي المهن....وهذه الفئات تخصصاتها نادره تحتاج اليها بلادنا التي هي من الدول الناميه....وللأسف بدلا من أن تعود هذه العقول لتسهم في تنمية مجتمعاتها تفضل الاستقرار في الدول المتقدمه على العوده .......في الحقيقه لاألومهم على عدم العوده لأنهم وجدوا من يقيمهم ويضخ عليهم دخولا أعلى... الا اننا ولله الحمد متوفره لدينا الماده والموارد الاقتصاديه ولكن للأسف القطاعين الحكومي ورجال الأعمال لايفعلون المستحيل لاستقطابهم والاسهام في تنميه الدوله كماتفعل الدول المتقدمه.

احداث عشتها

هلا ومرحبا،،
من السبت الماضي وانا هالك عمري عشان عندي امتحان يوم الثلاثاء 102 كمي وكان ولله الحمد سهل...ولكن ماتلاحظون انه عندنا طلاب يحاولون دائما ينسبون فشلهم على الدكتور او على طريقة الجامعه ككل بصراحه اتضايق اذا شفت واحد مهمل لأبعد درجه وآخرتها يحاول انه يرمي خطئه على طريقة الدكتور او على طريقة الكتاب... فيه عندي صديق من اول مادخلت انا وياه للجامعه وهو دائما يذم التعليم الجامعي عندنا هنا قد يكون معه حق في بعض الجوانب لكن في الأخير هو طالب جامعي ولازم يصقل شخصيته ويحاول انه يتكيف مع الوضع عشان يقدر يجابه الموقف.....فيه كلمة دايما يقولها لنا دكتور الاقتصاد الا وهي:اننا شباب اذكياء لكن ينقصنا دائما البحث عن المعلومه وتطوير الذات ،، ومعه كل الحق في ذلك فالاستسلام لن يفيدنا بشيء في منتصف الطريق الجامعي بل سيؤدي الى هدم خططك المستقبليه.......
=======================
يوم الأربعاء اللي مضى داومت الصباح ورجعت ونمت شوي وكان عندي محاضره من 4-5 طلعت من الكليه وبعدها توجهت لاستاد الملك فهد لحضور حفل اعتزال اللاعب (يوسف النثيان) رحت انا ومجموعه من الأصدقاء العزيزين على قلبي كان واحد مننا مجهز ترتيبات الروحه راح واشترى التذاكر قبل بيومين....كان جو رائع واحتفال مميز تميز فيه الهلال بمستواه وبتشريف يوسف الثنيان للحفل كانت ليله رائعه ولكن اللي ضيق صدري هو ترك يوسف الثنيان للكره....بالتوفيق له في حياته ان شاء الله...
=======================

العماله الأجنبيه وعدم احترامنا لهم...مشكله

هلالالالالا وسهلالالالالالالا ..........ممايشعرني بالضيق في الحقيقه هو معاملتنا للعماله الأجنبيه بمختلف الطبقااات....وعدم احترامنا لهم

فنحن منذ ولدنا والأجانب موجودين عندنا يعملون ومع ذلك منذ تلك الفتره حتى الان لم الاحظ تطور العلاقه بيننا وبينهم او محبتهم لنا تزيد..

بالعكس كل مالهم ويكرهوننا ..من معاملتنا السيئه وعدم معرفتنا لقيمتهم...

فأكثر من مره اطلع مع شخص لكوفي شوب مثلا تلقااه يدقق على العاامل في الطلب او في الخدمه وهو وراه الف شخص يخدمه وفوق كل هذا يزعق عليه مافيه اي معامله حسنه اصلا بعض الأحيان تلقانا نقابلهم بوجه كشرأو نقعد نطلب منه طلب تااافه مثل جب لي منديل وهو في الطاوله اللي جنبك وهو مشغووول جداوفوق كل هذا يجيبه وكلمة شكرا تطلع مننا بالطقاق...هو بشر وطاقاته محدوده ....بصراحه انا احتقر ذا الأشكال...ليش تستقوي عليه؟؟؟عشان الظرووف حدته وجاء عندنا يحاول يسترزق....

لونناظر لوجدنا انه اللي درسووونا اول مصريين الجنسيه او اردنيين ومع ذلك تلقانا نضحك عليهم ونستهزيء فيهم ومع ذلك الاحترااام تلقاه معدوووم ....والسباكين والكهربائيين من شرق آسيا معظمهم ومع كل هذا نستهزيء فيهم ويااااااااااااااااليتنا نعرف نسوي نص شغله بالفعل...اصلا لوخربت لمبه في بيتنا رحنا جبنا كهربائي يركبها...

ذيك المره كان معي ولد اختي وكان عندنا كهربائي قلت له:قل للرجال يجي يدخل للبيت............فسألني بدهشه:اي رجال؟؟

قلت له: اللي تحت...........فرد:لاهذا موب رجال هذا هندي!!!!!!!!! والله عيب احنا نربي عيالنا على عدم الاحترام ........الله يستر من وقت نضطرللسفر والعمل لديهم...

لونظرنا للأماراتيين مثلا..هم بصراحه اروع مثال انا رأيته في التعامل مع اي اجنبي سواء عربي او غير عربي....وتلقى تعاملهم معه راقي وهادي وعلى الاقل فيه احترام متبادل..

ماأقول الا الله يعيننا على اللي جاي بس...

وشكراااااااا

شوية سواليف عني

السلالالام عليكم,,

مرحبا بكم في المدونه الجديد حقي..

الذي انشيء في 9/12/2005
الساعه:10:35 بتوقيت بيتنا..

ودي اعرفكم بنفسي...

اسمي:عبدالله......والدلع:عبيد (بشد الياء

انا طالب في جامعة الملك سعود وبالتحديد في كلية المجتمع قسم ادارة اعمال (انتقالي) بكالوريوس
هذي ثاني سنه لي في الجامعه ....ولاتخلوااا من الحوسه والجد والفرح والغم

احب الميوزك الاجنبيه بشكل رهيييييييييييب واعشق فريق الهلال ....
اتمنى ان تكون هذه المدونه مكانا حرا لطرح تعليقاتكم الصريحه والأخويه.

اوكي.....

اراكم قريباااا وشكرا

السلام عليكم

هذا اول بوست لي حياكم الله